Til:

Tilde Birlik

Tilde, Fikirde, İşte Birlik!

Yazılım Proyektimizge Hoş Keldiñiz!

Mozilla Uyğulamaları içün Bazı Umumiy Marifetler

Aşağıdaki marifetler Firefox ve Thunderbird kibi uyğulamalar ile ayrı-ayrı ya da beraber qullanılabilir.

Güvenli Kip (İnglizcesi: Safe Mode)

Bir mesele ile qarşılaşılsa, bilhassa uyğulamanıñ başlatılmasında bir mesele peyda olsa, uyğulamanı Güvenli Kip'te başlatmağa isteybilirsiñiz (bu şekilde başlatqandan soñ, meseleniñ sebebi tapılsa kerekli deñişiklikler de yapılabilir). Misal olaraq, umumen til destesi eklentileri ancaq bir uyğulama çıqarılışı içün yapılır (meselâ, 22.0 içün (ekseriya emniyet meseleleriniñ çezimlerini temin etken 22.0.x kibi kiçik sürümler de aynı çıqarılışnıñ yañartmaları (güncellemeleri) sayılır)) ve soñraki çıqarılış içün (meselâ, 23.0 içün) til destesi eklentisiniñ de (eklengen İnglizce ibare ve/yaki cümlelerniñ tercimesini temin etken) yañı çıqarılışı kerekir. Ondan dolayı, Firefox ve Thunderbird, meselâ, 23.0 üzerinde 22.0 içün yapılğan til destesi eklentisini qullanmağa çalışmamalı. Faqat, sıq yapılmağa başlanğan çıqarılışlardan dolayı, Mozilla arada bir bütün eklentilerniñ (til destesi olsun, ya da adetiy uzantılar olsun) telif qabiliyeti ayarlarındaki azamiy sürüm degerini avtomatik olaraq yañartmağa çalışqandır. Sadece bir misal olaraq, bunıñ kibi marifetlerden dolayı, Güvenli Kip'niñ qullanılmasını kerektirebilecek bir vaziyet ortağa çıqabilir...

Emir satrından, meselâ, Firefox'nı Güvenli Kip'te başlatuv emri şöyle olur edi (amma, firefox yerine soñraki paragrafta atfetilgen sahifede tasvir etilgen tolu yolaq qullanılmalı olabilir):

firefox -safe-mode

Windows üzerinde emir satrı Başla/Start penceresindeki menü ve unsurlardan açılabilir. Ya da, yuqarıdaki kibi emirler doğrudan Başla/Start penceresindeki Çalıştır/Run (Çaptır) unsurınıñ saylanması üzerine açılğan pencerege yapıştırıla yaki yazıla bilir (ve soñra Enter tuşunıñ basılması yaki Tamam dögmesiniñ çertilmesi üzerine ifa etilirler). Bunıñ haqqındaki tafsilât mındadır...

Qullanıcı Profilleri

Bir qullanıcı bir Mozilla uyğulamasını başlatqanda, uyğulama evelâ onıñ profilini tapmağa çalışır. Profili yoq ise (meselâ, ilk qullanım), bir profil icat etilir. Bir profil içinde, saqlanğan ilmekler ve pencereler, qurulğan eklentiler, ziyaret etilgen saytlar, tesbit etilgen çörekler (çerezler) ve diger tafsilât saqlanır. Hususan, profil icat etilgende, uyğulamanıñ cari tili qullanıcınıñ Ev Sahifesiniñ tili olaraq tesbit etilir (uyğulamanıñ cari tili soñra bir Til Paketi qurularaq deñişse de, Ev Sahifesiniñ tili profil icat etilgende tesbit etilgeni kibi qalır, qullanıcı onı özü deñiştirmese).

Bir qullanıcınıñ birden çoq profili de olabilir. Mevcut profillerni körmek, profil(ler)ni eklemek, silmek ya da isim(ler)ini deñiştirmek içün, uyğulamanı Profil İdarecisi tarzında (modunda) başlatıñız. Meselâ, buyruq satrından Firefox'nı başlatuv buyruğı şöyle olur edi:

firefox -ProfileManager

Haberiñiz olsun: Profil İdarecisi uyğulama qurulğanda (ya da yañartması qurulğanda) qullanılğan tilde kösterilir. Qurulğan Til Paket(ler)i Profil İdarecisiniñ tiline tesir etmez, çünki bir Til Paketi bir profilniñ içinde eklenti olaraq qayd etilir ve Profil İdarecisi fırlatılğanda saylanğan bir profil yoqtır: bir profil saylanmaq üzre olur, amma saylanğan olmaz.

Uyğulamanı Qabuq Konsolı ile Başlatuv

Bazı eklentiler, ifaları haqqında bazı mesajlarnı konsolğa yazarlar. Bu mesajlar qullanıcı arayüzünden açılabilgen Hata Konsolında da körülir, amma Hata Konsolında uyğulamanıñ da mesajları olur ve ondan dolayı anda çoq fazla mesaj bulunır. Qabuq konsolında ise eklentilerniñ mesajlarını körmek çoq daha qolaydır.

Eklentiler tarafından konsolğa yazılğan mesajlarnı körmege isteseñiz, uyğulamanı qabuq konsolı ile başlatıñız. Meselâ, buyruq satrından Thunderbird'nı başlatuv buyruğı şöyle olur edi:

Windows qullanmasañız, adetiy buyruqnı qullanmaq yeterlidir: thunderbird
Windows qullansañız, qabuq konsolı içün uyğulama qabuq konsolı tarzında (modunda) başlatılmalı: thunderbird -console

Meselâ, bu lâyihanıñ Til Paketleri, eklenti qurulımından soñ hususiy malümatnı qorumağa tırışaraq yapqanları deñişiklikler haqqında konsolğa mesaj yazarlar.

SourceForge.net Logo